MHS se 2018 Atlete

Anna Blom presteer in die 400m

Middies se Kleure Atletiekbyeenkoms het 2018 op Cradock se Rovers atletiekstadion plaasgevind. As gevolg van die droogte en waterbeperkings kon die byeenkoms nie tuis plaasvind nie. Vir verskeie atlete was dit ‘n eerste keer dat hulle op tartan gehardloop het en het hulle die ervaring baie geniet.

Die atlete het puik presteer en die volgende rekords het in die slag gebly: Vir stel Christopher Legg ‘n nuwe rekord op vir S/0 15 Gewigstoot met ‘n afstand van 12,36m terwyl Christiaan Vorster die S/0 16 Diskus rekord verbeter met ‘n nuwe afstand van 35,22m. Die Victor en Victrix Ludorum, toekennings waarvan die kriteria die mees veelsydige atleet van die dag is, is onderskeidelik Marelize Beukes en Wanga Thiso.

Tydens die dorpsbyeenkoms in Midros, het Middies se atlete 21 eerste plekke, 13 tweede plekke en 4 derde plekke behaal. Ongelukkig was daar geen hamer-, spiesgooi of diskus by hierdie byeenkoms nie. Indien hierdie 3 items aangebied was, sou daar verseker nog meer plekke behaal wees aangesien hierdie items Middies se sterkpunte is.
Altesaam 45 atlete het deurgedring na die Inxuba Yethemba Distriksbyeenkoms wat Saterdag 10 Februarie in Cradock plaasgevind het.

Megan Newton het deur die seisoen ‘n goeie hoogte en tye gehandhaaf en behaal sy ‘n 1ste plek in hoogspring en 80m hekkies by die Oos- Kaap Kampioenskappe in Port Elizabeth.
Tydens die SA- byeenkoms behaal Megan ‘n 6de plek uit 17 atlete vir hoogspring. Wat die prestasie meer merkwaardig maak is dat sy in die 0/15 ouderdomsgroep moes deelneem aangesien daar nie vir 0/14’s voorsiening gemaak word by die SA’s nie. Sy spog dan ook met ‘n hoogte van 1,60 meter.

Sy behaal ook ‘n 6de plek in haar uitdun vir die 80 m hekkies. Beslis ‘n prestasie om op trots te wees.

Megan Newton by SA’s

Hamergooi kliniek by MHS deur Charlie Koen aangebied:

Op 21 en 22 Februarie 2018 het 15 geesdriftige hamergooiers ‘n hamergooi-kliniek in Middelburg bygewoon wat deur Charlie Koen aangebied is.
Koen het groot geword in ‘n hamergooi huis. Sy pa, Charlie Koen snr. was ‘n voormalige S.A. senior rekordhouer. Sy broer, Basie Koen, is hoofafrigter in S.A. by die Hamergooi Akademie in Sasolburg terwyl sy seun Jacques, die 0.15 skole rekord van 72 m hou.

Charlie was self drie keer die 0.19 S.A. kampioen asook nege keer die S.A. Senior kampioen. Hy het ook Nasionale kleure in hamergooi verwerf.

Middies het tydens die afgelope atletiekseisoen 18 hamergooiers gehad wat hul vaardighede onder Koen se wakende oog kon slyp.

Hamergooi kliniek

Cradock Top 10 Atletiekbyeenkoms

MHS het einde 2017 aan die Cradock Top 10 Atletiekbyeenkoms deelgeneem. Drie-en -tagtig skole het aan die byeenkoms deelgeneem en MHS behaal ‘n algehele sewentiende plek.

Jannie Blom tydens 400m by Cradock Top 10 Atletiekbyeenkoms

Amy Newton neem deel aan die Skole Top 10 Atletiekbyeenkoms

Die volgende atlete presteer:

A-Span

Jannie Blom S/17, 400 m, derde plek, brons medalje
Sanrie Lessing D/15 verspring, derde plek, brons medalje

B-Span

Wanga Thiso S/17 hamergooi, eerste plek, goue medalje
Guhan van der Ryst S/15, 800m, derde plek, brons medalje
Lihle Mlondleni S/17 hoogspring, tweede plek, silwer medalje
Wanga Thiso S/17 hoogspring, derde plek, brons medalje
Clive Green S/17 spiesgooi, eerste plek, goue medalje

Standard Bank/ J.P. Botha en J.F. Atletiekbyeenkoms

Middies se atlete het Oktober 2017 weereens puik presteer tydens die Standard Bank/ J.P. Botha en J.F. Atletiekbyeenkoms wat in Bloemfontein plaasgevind het:

Die volgende uitslae is behaal:
Lihle Mlondleni S/19 Hoogspring – 1ste plek
Wanga Thiso S/19 Hamergooi – 2de plek

Middies is ongelooflik trots op ons eie SPRINGBOK! Marga Cumming het oudergewoonte uitsonderlik presteer en behaal ‘n eerste plek op ASA. Sy verbeter ook die SASSA record vir V/19 met ‘n pragafstand van 55.55m. Marga het ook die Suid-Afrikaanse Senior Atletiekspan verteenwoordig by die Afrika-spele en ‘n sewende plek behaal. Voorwaar ‘n wonderlike prestasie, veral as daar in ag geneem word dat sy nog op skool is! Die skool werk baie hard om talent te ontwikkel en daarom word daar, buiten die magdom byeenkomste aan die begin van die jaar, ook vir die atlete wat wil presteer, die geleentheid gegee om aan die einde van die jaar aan nog twee byeenkomste deel te neem. Die OP het ook begin met n reeks aandbyeenkomste (Friday Night Lights) waaraan van ons atlete nou al vir ʼn tweede seisoen met sukses deelneem. ʼn Afrigtingskursus is ook hierdie jaar deur van ons atlete en personeel bygewoon.

Marga Cumming is aangewys as Suid-Afrika se 0/19 hamergooi kampioen vir 2016! Sy spog met ‘n pragafstand van 54,45m.

Drie van ons skool se atlete is in die Chris-Hani span opgeneem. Hulle het 4 & 5 Maart aan die Oos-Kaapbyeenkoms in Oos-Londen gaan deelneem. Ons atlete het besondere goeie prestasies behaal.

Die uitslae is as volg:

Marga het ‘n 1ste plek in hamergooi behaal met ‘n afstand van 54,28m. Sy het ook ‘n 2de plek behaal in gewigstoot met ‘n afstand van 9,6m.

Amy het deelgeneem aan verspring en het ‘n 3de plek behaal met ‘n afstand van 4,48m

Lee-Ann het ook deelgeneem aan hamergooi. Sy het 3de gekom met ‘n afstand van 29m.

 Marga is in die Oos-Kaapspan opgeneem wat aan SASA gaan deelneem het in Bloemfontein van die 16de tot die 19de Maart.

Ons atlete presteer op vele terreine tydens die kleure byeenkoms, plaaslike byeenkomste, Chris Hani atletiekbyeenkoms op Cradock asook in Port Elizabeth.

Tydens die Oos-Kaap atletiekkampioenskappe in Port-Elizabeth is verskeie goud, silwer en brons medaljes ingepalm.